2 MK, 1 KK, PFL və xərçəng xəstəliyi

2 MK, 1 KK, PFL və xərçəng xəstəliyi

Məlum məsələdi, danışmırlar. Ümumi abu-havanı korlamamaq üçün susurlar. Amma SOCAR rəhbərliyinə özünü şirin satmağı bacaran adam futbol təsərrüfatında tanrılıq eşqinə düşüb. Əlaltılarının təzim etdiyi bütün - Elxan Məmmədovun istəyi ilə AFFA-da yaradılan komitələrin vəziyyətinin nə yerdə olduğunu isə hamı bilir.

AFFA yanında Media Komitəsi - fiasko

Jurnalistlərin böyük qismini assosiasiyaya yığdılar, layihələrə görə pul verdilər, millinin oyunlarına səfərlər təşkil etdilər... Az keçməmiş komitədaxili çəkişmələr başladı. Media mənsublarının yarısı tələyə salındıqlarını anlayıb gec də olsa səhvlərini düzəltdilər. "Ayılanlar”ın atdığı addım "yatmağı” seçənləri də vəziyyətdən çıxartdı. Kağız üzərində futbol təsərrüfatını işğal siyasətinin böyük budaqlarından biri sındı... İndi Media Komitəsi fəaliyyətini dayandırıb. Nə xəbər var, nə ətər. Getdi gedərgəlməzə! Neftin pullarının hesabına idman mətbuatında haqq sözü deyənlərin "ağzını qıfıllamaq” planı şahmatdakı "detskiy mat”ı xatırladırdı. Zatən, belə də olmalıydı.

Məşqçilər Komitəsi - qara yumor

Öz gücünə, istedadına inanan çalışdırıcılardan heç biri Məmmədovun qılıncının altından keçməyi özünə sığışdırmazdı və sığışdırmadı. İctimai qınaq deyilən anlayış var. İşlədikləri dönəmdə yığdığı pullardan doymayanlar, qanad altına sığınmağı özünə ar bilməyənlər, aydın səhərlərin birində "tfu” deyib getməyə cəsarəti çatmayanlar yenə komitədədi. Baş katib barmağını sağa yelləyəndə sağa, sola yelləyəndə sola doğru hərəkət edirlər. Lazım olanda ictimaiyyətin fikrinin yayındırılması baxımından diplomatik təbəssümlü "xanədan mənsubu”na xidmət göstərir, aylıq əməkhaqqı alırlar. Təklikdə bir-birinin dalınca döşəyir, üz-üzə gələndə fərqli sima alırlar. Bu, ölkə futbolunun qara yumorudu. Başqa nə ad verəsən?

Klublar Komitəsi - rəzalət

Futbolun problemlərini çözmək əvəzinə PFL-in "vurulması” yolunda atılan addım idi. Fəqət bu gün klublar nəinki bu formal komitədən fayda görür, əksinə, hər toplanış zamanı mənasız yığıncağa göndərməyə adam axtarırlar. KK fəaliyyətə yeni başlayanda iddialı çempionat iştirakçıları toplantılarda azı vitse-prezident səviyyəsində təmsil olunurdusa, indi menecerlər itirdiyi vaxta heyfsilənə-heyfsilənə yığıncaqları başından edir. Sözügedən komitə nə PFL-ə rəqib ola bildi, nə də başqa işə yaradı. "Vəzir”in bu həmləsi də boşa çıxmış kimi bir şeydi.

PFL demişkən, bu yaxınlarda qurum nə dərəcədə faydalı işlər görə biləcəyini növbəti dəfə isbatladı. Antalyada ənənəvi təlim-məşq toplanışı düzənləyən klublarımızın yoxlama oyunlarını internet üzərindən yayımla Azərbaycanda futbolsuz qalan futbolsevərlərə təqdim etdi. Əslində qurumun prezidenti Ramin Musayevlə bir neçə işçisinin qardaş ölkəyə yollanması həmişəki qaydada çempionat iştirakçılarının ziyarətinə hesablanmışdı. Amma neftin puluyla maliyyələşən iki telekanalın cılızlığını özləri istəmədən üzə çıxardılar.

AzTv-nin və törəməsi "İdman Azərbaycan”ın klublardan samballı paralar qoparmamış bu yöndə nəsə etməyəcəyi əvvəldən bəlliydisə, Elxan Məmmədovun təşəbbüsü ilə yaradılan "CBC Sport” da nədənsə alqışalayiq addıma ehtiyac duymadı. Düzdü, yavaş-yavaş "İdman Azərbaycan”ın rəhbəri Elsevər Dünyamalıyevi xatırlatmağa başlayan "CBC Sport” başqanı Volkan Üst doğma yurduna baş çəkməkdəydi. Bir dünya avadanlıq aparıb cəmi 4 yoxlama görüşünü işıqlandırmaq hədəfi ilə Antalyaya yollanmışdılar. Üstün saytımıza verdiyi müsahibədə söylədiklərinə diqqət yetirək:

"Demək olar ki, bütün PTS-i söküb gətirmişik (gülür). Hə, çünki bu havada peykə də etibar etmədik. Bir səyyar peyk sistemimiz də var idi. Şimşək vurmasından çəkindik. Ona görə də açmadıq. Yaxşı ki, açmamışıq, çünki çox şimşək çaxdı. Dörd oyun planlaşdırmışdıq. Bunlardan "Qəbələ"nin "Fakel"lə oyunu təxirə salındı. Digər 3 matçı efirə verdik. Yanvarın 21-i Antalyaya gəlmişdik. Bu gün işləri yekunlaşdırdıq və sabah Bakıya dönürük. Bəzi oyunlara sadəcə baxdıq. Sağ olsun klub nümayəndələri, özlərinin çəkdikləri görüntüləri təqdim etmişdilər. Biz də xəbərlərdə istifadə etdik. Antalyaya niyə daha tez gəlmədik? Fevralda başlayacaq Çempionlar Liqası və Avropa Liqasına hazırlaşmalı idik. Müəyyən proflaktik tədbirlər görülməli idi. Çempionatda da fasilə olduğundan bu işləri gördük”.

Olduqca gülünc izahdı, deyilmi? Bir halda ki, oyunları böyük xərc çəkmədən, PFL-in apardığı, qıvraq avadanlıqlarla qənaətbəxş səviyyədə yayımlamaq mümkündü, belədə niyə "CBC Sport” PTS-i söküb şəllənməli və son nəticədə 2 oyun çəkərək sonuncuda da özünü biabır etməli idi? "Qarabağ” - "Şaxtyor” (1:3) matçını izləyənlər 10 dəqiqəyə yaxın kəsilmələrlə, çox yarıtmaz və həvəskar səviyyədə ortaya çıxarılan "məhsul”u gördü.

Yağlı əppək - ölkə çempionatı AzTV və "İdman Azərbaycan”ın acgöz rəhbərliyinin əlindən niyə alınıb, "CBC Sport” hansı hədəflə yaradılıb? Başa düşürük, telekanal birbaşa Məmmədovun mövqeyini müdafiə etməli, ən çətin anlarda ən önəmli xəbərlərin ictimaiyyətdən gizlədilməsinə yardımçı olmalı, baş verən hadisələrə "yuxarılar”ın strategiyasına uyğun don geyindirməlidi. Böyük Britaniya vətəndaşları deyilik ki… Azərbaycanın öz reallıqları var və nə yazıq ki, bu reallıqları nəzərə almadan başqa tələblərlə çıxış etməyimiz səhrada gül axtarmağa bənzəyər. Ancaq Volkan bəyin izahlarıyla kifayətlənmək üçün ya özünü axmaqlığa vurmalısan, ya da futbol təsərrüfatına yalnız yaxşı qazanc mənbəyi gözüylə baxanlarsayağı "cəhənnəm olsun hamısı, bu mənim işim deyil” düşüncəsiylə susmalısan. Ayıbdı, böyük ayıb. Avroliqa və Çempionlar Liqası matçlarını dünyanın onlarla "bərkgedən” telekanalından da izləmək olar. Əsəbsiz, kəsintisiz, senzurasız şərhlərdən zövq ala-ala… Həm də heç bir hava şəraitində ildırımı, şimşəyi günahlandırmağı ağıllarından keçirmədən işlərini peşakərlıqla görürlər. "CBC Sport” da əsas gücünü AL və ÇL-ə qoyursa, üstəlik Volkan bəy haqqı deyirmiş kimi, gülə-gülə səbəbləri sadalayırsa, bu layihə də oldu "fıs” çıxan komitələrin tayı.

"Vəzir” indi də Hakimlər və Hakim İnspektorlar Komitəsini birləşdirib, Frits Stuxlikə tapşırıb. Belə desək, PFL-in mühasirə üzüyünü bir qədər də daraldıb. Daha klubların çempionatdakı xətalar və qərəzlərlə bağlı şikayət edəcəyi yer qalmayıb. Rüşvətxorluğuna görə əvvəlki Hakimlər Komitəsindən uzaqlaşdırılmış sabiq hakimlər avstriyalı sədrin yanına şam kimi düzülüb.

Sizə kiçik qüvvə kimi görünməsin. Klublardan 10 min, 15 min aldığına görə qovulmuş digər simalar bir yana, orda "Kişmiş” restoranında "Neftçi”nin prezidenti Kamran Quliyevlə görüşməyə artıq imkan tapmış Elçin Məmmədov varsa, əmin olun, sular durulmayacaq. Bu insanın tək varlığı birləşdirilmiş komitələrin iç üzünün aşkara çıxmasına bəs edir.

Hakimlərin həmişəki kimi Türkiyəyə yox, bu qış Mingəçevirə yollanması da gözdən pərdə asmaq cəhdindən başqa bir şey deyildi. Gələn qış eyni qaydada Antalyanın yolunu tutsalar, kimsə təəcüblənməyəcək. Guya PFL-in nəzarətində olanda ədalət təmsilçilərinə görə əlavə pullar xərclənirmiş, indi Məmmədovun gətirdiyi cahanşümül yenilik sayəsində hər şey qaydasına düşüb. Stuxlik yerli qazanda nə bişdiyini bilməyən və burdan gedənə qədər bilməyəcək avropalıdı. Media Komitəsinə yığışanların, Klublar Komitəsinin toplantılarına söyə-söyə gedənlərin, PFl-in və şərəfli hakimlərin isə bircə varlıqdan qurtulması vacibdi : Azərbaycan futbolunun xərçəng xəstəliyindən – AFFA-nın baş katibi Elxan Məmmədovdan. Gəldiyi yerə qayıtsa, yavaş-yavaş hər şey düzələcək. Yaşayarıq, görərik. (Fanat.az)

OXŞAR XƏBƏRLƏR

XƏBƏRLƏR
BLOGLAR