AFFA Qarabağda keçiriləcək Avropa çempionatı ilə bağlı hansı addımı atacaq?

AFFA Qarabağda keçiriləcək Avropa çempionatı ilə bağlı hansı addımı atacaq?

"Biz bu yarışın keçiriləcəyini öyrənən vaxtdan mübarizə aparırıq". 

Sport7.az xəbər verir ki, bu barədə "Sputnik"ə AFFA-nın mətbuat xidmətinin rəhbəri Firuz Abdulla məlumat verib.

2019-cu ildə Müstəqil Futbol Federasiyaları Konfederasiyasının (CONIFA) himayəsi altında, Dağlıq Qarabağ ərazisində BMT və Azərbaycan tərəfindən tanınmayan ərazilərin milli komandaları arasında çempionat keçiriləcək. Yəni müstəqilliyi tanınmayan ərazilər arasında Avropa çempionatı baş tutacaq.

"Ötən ilin avqust ayında müəyyən olunanda ki, yarış "Dağlıq Qarabağda" keçiriləcək, AFFA rəhbərliyi dərhal məsələyə reaksiya verdi. AFFA onlara rəsmi müraciət etdi. FIFA və UEFA-ya, həmçinin CONIFA-nın mənzil-qərargahının yerləşdiyi və turnirin təşkil olunduğu İsveçin futbol federasiyasına etiraz məktubları ünvanladıq" – deyə Firuz Abdulla əlavə edib.

Firuz bəy onu da qeyd edib ki, AFFA 2019-cu ildə də CONIFA-nın təşkilatçılığı ilə qondarma "Dağlıq Qarabağ" Respublikasında keçirilməsi planlaşdırılan Avropa çempionatı ilə bağlı özünün səlahiyyəti çərçivəsində olan bütün hüquqi prosedurların yerinə yetirilməsini təmin edəcək. Bununla bağlı FIFA və UEFA-ya müvafiq müraciətlər göndəriləcək.

"Azərbaycan Futbol Federasiyaları Assosiasiyası olaraq, işğal altındakı Azərbaycan torpaqlarında elan olunmuş qondarma "Dağlıq Qarabağ" ərazisində CONIFA-nın təşkilatçılığı ilə keçiriləcəyi bildirilən Avropa çempionatını qəti şəkildə pisləyirik və buna qarşı mövqeyimiz dəyişməyəcək" - deyə AFFA-nın sözçüsü vurğulayıb.

İlk iki Avropa çempionatı 2015 və 2017-ci illərdə Macarıstanda və Şimali Kiprdə keçirilib. Özünü müstəqil elan edən "Dağlıq Qarabağ Respublikası" komandası yalnız CONIFA tərəfindən 2014-cü ildə təşkil olunan Dünya Çempionatına qatılıb. Həmin yarışda da məğlub olub.
 
Sport7.az

OXŞAR XƏBƏRLƏR

XƏBƏRLƏR
BLOGLAR