Hazırda "Qarabağ”ın 56, "Qəbələ”nin isə 52 xalı var. Topaz Premyer Liqasında mövsümün bitməsinə isə 5 tur qalıb. Deməli, bundan sonra "Qarabağ” bütün oyunlarını uduzsa, "Qəbələ” isə qalan beş oyunun hamısından 3 xalla ayrılsa... Yox, özümün də inanmadığım nəsə barədə danışmaq istəmirəm. Özümüzü niyə aldadırıq?! Bəli, "Qarabağ”a cəmi bir xal lazımdı. Onu da artıqlamasıyla qazanacaq. Və ardıcıl 5-ci dəfə qızıl medallar "Qarabağ”ın futbolçularının boynundan asılacaq.

Düşünmək olardı ki, "köhlən atlar” üçün bu mövsüm birinciliyə gedən yol xeyli çətin alınacaq. Qurban Qurbanovun komandası Çempionlar Liqasının qrup mərhələsinə yüksəlməklə həm eyforiya ehtimalını artırmış, həm də özü üçün ağır qrafik müəyyənləşdirmişdi. "Qəbələ” isə son iki mövsümdən fərqli olaraq, Avropa Liqasıyla erkən vidalaşmışdı. Qrup mərhələsində çıxış etməyən əyalət təmsilçisinin daxili çempionata köklənmək, daha yaxşı mübarizə aparmaq şansı yaranmışdı. "Qarabağ”ın "sükançısı” Qurban Qurbanov qışdan sonra milli komandaya da diqqət ayıracaqdı. Kapitan və lider Rəşad Sadıqovun da üzərində əlavə məsuliyyət payı yaranmışdı.

Bütün bunlar "Qəbələ”nin xeyrinə olan amillər idi. Amma onlar bundan yararlana bilmədilər. Özü də əvvəlki mövsümlərdən fərqli, "Qəbələ” bu dəfə daha erkəndən büdrədi. Yarışdan, mübarizədən çəkildi. Sona qədər vuruşmağa nəsə çatmadı. Sonuncu dəfə martın 9-də "Kəpəz”i minimal hesabla üstələyən "Qəbələ” ondan sonrakı beş oyunda 1:1 hesablı heç-heçəyə razılaşıb!

Ümumiyyətlə, qış fasiləsindən sonra "Qəbələ” cəmi iki qələbə qazanıb – "Kəpəz” və "Zirə” üzərində. "Səbail”lə "Neftçi”yə eyni – 1:2 hesabıyla uduzan "qırmızı-qaralar” "Qarabağ”la qolsuz bitən oyunda bir xal qazanıb. Halbuki, qış fasiləsinə qədər komanda inamlı görünür, 6:1, 3:1 hesablı qələbə qazandığı oyunlarda məhsuldarlıq sərgiləyirdi. Nə olduysa, "Zirə” ilə oyunda oldu. Həmin qalmaqallı oyundan sonra "Qəbələ” ləngər vurmağa başladı.

Premyer Liqada rəqabətin olmaması, "Qarabağ”ın vaxtından əvvəl və rahatlıqla çempionluğunu elan etməsi müəyyən mənada narahatçılıq yaradır. Bu məqam çempionatımıza olan marağı azaldır, onu "bir aktyorun teatrı”na çevirir. Amma digər tərəfdən baxanda görürük ki, belə bir tendensiya Avropanın əksər çempionatlarında, xüsusən də "böyük beşlik”də də var.

Dünən çempionluğunu bayram edən "Mançester Siti” sona 5 tur qalmış həmşəhərlilərini 16 xal qabaqlayırlar. "Bavariya” isə ikinci yerdəki "Şalke”dən düz 20 xal irəlidədi və hələ ötən tur qızıl medalları təmin etmişdi. PSJ də əsas rəqibi "Monako”nu 7:1 hesabıyla darmadağın etdi və çempionluğunu rəsmiləşdirdi. İspaniyada finişə 6 tur qalmış "Barsa”nın çempionluğu şübhə doğurmur. Kataloniya təmsilçisi "Atletiko”dan 11, "Real”dan isə 15 xal irəlidədi. A seriyasında da "Yuventus”un qızıl medallara gedən yolu hamardı. "Milan”ı yenə bilməyən "Napoli” Turin klubundan 9 xal geridədi və çempionatın bitməsinə 6 tur qalıb.

Deməli, bizdəki vəziyyət heç də acınacaqlı deyil. Avropada da "Qarabağ” kimi hegemonluq edənlər yetərincədi. Vəziyyətlə barışmalıyıq.