Azərbaycanın “Fanat”ı

Azərbaycanın “Fanat”ı
Üç gün bundan əvvəl "Fanat.az” özünün 10 illik yubileyini qeyd edirdi. Kifayət qədər ciddi rəqəmdi. Azərbaycanda internet mediasının yaşını, ümumiyyətlə, ictimai-siyasi xəbər saytlarının o qədər də böyük tarixə malik olmadığını nəzərə alanda bu 10 rəqəminin tarixi əhəmiyyəti, çəkisi daha da artır.

Azərbaycanda futbol klublarının hər il tarixin yaddaşına köçdüyünü də yaxşı bilirik. Dövr o qədər qarışıq, zəmanə o qədər ağırdı ki, bu gündən sabaha ümid saxlamaq, sabah nəyin necə olacağını proqnozlaşdırmaq da olmur. Məmləkətdə milyonlarla büdcəsi olan futbol klublarını 10 il ayaqda saxlamaq mümkünsüz bir işə çevrilibsə, bu məmləkətin idmanından-futbolundan yazan bir saytı 10 il ayaqda saxlamaq, yaşatmaq özü bir hünərdi. Həmin hünəri də "Fanat.az”ın kollektivi başda dəyərli Əli Sahib olmaqla göstəriblər. Sevimli "Fanat.az”ı bu yaşına qədər qorumağı, 10 yaşın ləzzətini dadmağı bacarıblar.

Ayaqda durmaq sözünü boşuna işlətmədim. Nəfəs almaq, yaşamaq, illəri bir-birinin ardınca yola salmaq asan işdi. Bunu hərə bir cür bacarır. Amma ayaqda dik durmağı, büdrəməməyi (əyilməməyi) hər adam bacarmır. Ötən 10 ildə bunu çox görmüşük. Tamahına yenik düşənlər də olub, yolunu və əqidəsini çox asanlıqla dəyişənlər də. Ayaqda durmağın, dik dayanmağın əzəmətini nələrəsə qurban verənləri də həmin bu tarix yazıb. Əli Sahib və "Fanat.az”ı büdətmək, yıxmaq, əymək heç kimə müyəssər olmayıb.

Tərif deyəndə özümü narahat hiss edirəm. Xüsusən də bu tərifi dostlarım haqda demək mənim üçün heç də sevimli məşğuliyyətlərdən deyil. Di gəl ki, atalarımız da "igidi öldür, amma haqını ver” deyiblər. Əli Sahib mənim dostumdusa, mən onun rəhbərlik etdiyi sayt haqqında tərifli sözləri gizlətməməli, dostlarımın haqqını verməkdə xəsis davranmamalıyam.

Bəli, Əli Sahib və onun rəhbərlik etdiyi "Fanat.az” Azərbaycanın idman mətbuat üçün bir dəyərdi. Onun öz saytını necə sevdiyini, "Fanat.az”ın təmiz adını, peşəkarlığını və operativliyini qorumaq üçün hansı əziyyətlər çəkdiyini çox görmüşəm. Bu gün "Fanat.az” şərəfli tarixi və 10 il ərzində keçdiyi yolla çox rahatlıqla öyünə bilər. Azərbaycanda bir çox həqiqi dəyərlər öz real qiymətini almır, layiq olduğu yerdə olmurlar. Amma bundan ötrü ruhan düşməyə dəyməz.

"Fanat.az” 10 ildi ki, Azərbaycan idmanına və idman mətbuatına xidmət edir. Bundan sonra çox 10 illilklər keçəcək. "Fanat.az” öz yolundan dönməyəcək. Çünki o, Azərbaycanın "Fanat”ıdı. Fanatlar üçünsə öz sevdiklərindən və inanaraq getdikləri yoldan daha dəyərli heç nə yoxdu.

10 yaşın mübarək olsun, "Fanat.az”! Həmişə belə əzəmətli qal!
 
Amal ABUŞOV
 

Xəbər lenti