Əziz qadınlar, bayramınız mübarək!

Əziz qadınlar, bayramınız mübarək!
Əziz Azərbaycan qadınları. Sport7.az olaraq sizləri Beynəlxalq Qadınlar günü münasibətilə təbrik edir, daim sevdiklərinizlə birlikdə olmağı, əsl sevgi qədər ömür yaşamağı, xoşbəxtlik arzulayırıq. Sizsiz nə dünya olar, nə də həyat. Allah sizləri, təravətinizi, gözəlliyinizi qorusun. BAYRAMINIZ MÜBARƏK!
 
Qara paltarlı qadın (Ramiz Rövşən) 
 
Kişilər bir olmur, atam balası, -
qorxağı var, igidi var.
Amma hər kişinin öləndən sonra
qəbri üstə ağlayası
Bir qara paltarlı gözəl qadına
ümidi var.

Sən öləndə
kim olacaq gözlərini bağlayan?
Qardaşmı olacaq,
                            yadmı olacaq?
Bu dünyada
bəlkə sənə ən çox ağlayan
Ən çox ağlatdığın qadın olacaq.

Göz yaşları yuduqca baş daşını,
Qəbrində qurcalanıb
                               deyəcəksən,
İlahi, illər boyu ağlatdığım bu qadın
görən necə saxlayıb
bu qədər göz yaşını?!

Bircə kərə
nə saçını oxşamışam,
nə gözünü silmişəm,
Gözlərimə batır indi
saçlarının hər dəni.
İllər boyu
bu qadına mən axı dərd vermişəm,
İndi görən niyə çəkir dərdimi?!

Bu qadın
baş daşımı
öpüb sığallamaqdansa,
Yumruğuyla döysə, döysə yaxşıdı.
Qəbrimin üstündə ağlamaqdansa,
Məni söysə yaxşıdı.

Yeri, yeri, qara paltarlı qadın,
Kiri, kiri, qara paltarlı qadın.
Bu qəbir də min qəbirdən biridi,
baş daşımı bəsdi basdın bağrına.
Bütün mənə ağlayanlar kiridi,
sən də kiri, qəbrim damır, ağlama!..
 
Sport7.az

Xəbər lenti