"İmarət Tayfa" "Neftçi"yə qarşı hansı planı hazırlayıb?

"İmarət Tayfa" azarkeş qrupunun idarə heyətinin üzvü Qabil Hüseyn fevralın 3-də Tofiq Bəhramov adına Respublika Stadionunda baş tutacaq "Qarabağ" - "Neftçi" matçı ilə bağlı fikirlərini bildirib.

Qabil bəy Sport7.az-a açıqlamasında əzəli rəqiblərinə qarşı oyunda hansı şəkildə təşkilatlanacağı və sevimli komandalarına necə dəstək verəcəkləri ilə bağlı danışıb: "Ola bilsin ki, Adil Nadirovun dünyasını dəyişməsi ilə bağlı pankart açaq. Azarkeş qrupunun idarə heyətinin üzvləri onun vəfatını eşidən kimi dərhal gedib dəfnində də iştirak edib. Ailəsinə də başsağlığı vermişik. Adil Nadirov həm "Qarabağ" üçün tarixi şəxsiyyət, həm azarkeş qrupunun, həm də ictimaiyyətin fəxri üzvüdü. 2012-ci ilin yekunundakı tədbirdə ona fəxri ad vermişdik. Onun vəfatını dərin hüznlə qarşıladıq". 

"Qarabağ" fanatı oyunda rəqibləri qıcıqlandıracaq planlarının olmadığını da bildirdi: "Neftçi"ni qıcıqlandıracaq planımız hələ ki, yoxdu. Fikirləşirdik ki, qarşı tərəfin azarkeş qrupu oyuna gəlməyəcək. Ancaq son iki gündə gələcəklərini açıqladılar. Ona görə də əvvəlcədən planlaşdırdığımız xüsusi nəsə yox idi. Oyun "Tofiq Bəhramov"da olacaq. Stadion böyükdü. Evimizdə oynayırıq, çox həlledici görüşdü. Çempionluq yolundakı rəqibimizdi, ona görə də çalışacağıq azarkeşlərin sayı çox olsun. "İmarət" 600-700 nəfərlə stadiona gələcək".

Maraqlıdı azarkeşlər Reynaldo və Almeydanın "Qarabağ"a qayıdışı üçün nəsə hazırlayıbmı?: "Xeyr, xüsusi nəsə yoxdu. Yəqin ki, oyun vaxtı çağırıb alqışlayarıq. Reynaldonun oynamayacağı dəqiqləşib".

Sport7.az

Xəbər lenti