Komandanın oyuna hazırlığı ilə bağlı "Qəbələ" futbol Akademiyasının meneceri Nail Kərimovla danışdıq. Nail bəy Sport7.az-a açıqlamasında bunları söylədi:

 

"Bacardığımız qədər irəliləməyə çalışacağıq. Təbii ki, gücümüz çatarsa ilk mərhələni keçmək, ən azı yaxşı futbol göstərmək niyyətliyik. Komanda hazırlıqlarını davam etdirir. Hazırda mərhələni keçmək haqda düşünürük. Onsuz da başqa bir hədəf ola bilməz. Şanslarımız bərabərdi. "Şerif" o qədər də keçilməz rəqib deyil. Onlar da bizim haqqımızda eyni şeyi düşünürlər. Biz hardasa 2012-2013-cü illərdə "Şerif"in bazasında olmuşuq. Həmin vaxt artıq 10 il idi ki, o bazadan istifadə edirdilər. Onların heç də bizimkindən geri qalmayan bazaları var. Asan olmayacaq, amma keçilməz rəqib də deyillər. Kim daha çox istəklidisə o da mərhələni keçəcək".

Nail bəy həm psixoloji həm də fiziki hazırlıqlarla bağlı bunları söylədi: "Avqustun 1-dən hazırlıqlara başlamışıq. Bilirsiz ki, AFFA-nın çempionatlarla bağlı qərarından sonra əvəzedicilərimiz birinci divizionda oynamadılar. U-19-un böyük əksəriyyəti də məhz əvəzedicilərdə çıxış edirdi. Bu məsələlərlə əlaqədar həmin uşaqlar 10 gün istirahət etdilər. Bakıda və Qəbələdə hazırlıq keçmişik. Yoldaşlıq görüşləri olub. Kənardan da heç bir futbolçu cəlb edilməyib. Hazırlıqları qənaətbəxş saymaq olar. Bilirsiz ki, havalar, o cümlədən meydançalarımız da yaxşıdı. İstədiyimiz vaxt məşqləri etmişik. Çatışmayan məqam yoxdu, hər şey qaydasındadı. Cəmi bir zədəli futbolçumuz var. O da artıq 2 həftəyə yaxındı komanda ilə birlikdə məşq edir. Müəyyən hazırlıqdan sonra meydana çıxıb oynaya bilər. Psixoloji hazırlığa gəlincə, əlbəttə, futbolçular da bilirlər ki, hər hansı çempionat nəyinsə sonu və ya başlanğıcı deyil. Buna baxmayaraq, futbolçular oyunlar ciddi yanaşırlar. Növbəti mərhələdə bu oyunun qalibini "Herta" kimi komanda gözləyir. Futbolçularımız da fərqindədi ki, belə komandalarla oynamaq yaxşıdı, təcrübədi. Artıq akademiyamızdan bəzi futbolçular belə oyunlarda meydana çıxıb. Komandada futbolçular 17-19 yaş arasındadı. Yəni, onlara əlavə nəsə deməyə ehtiyac yoxdu".

"Qəbələ"nin məşqçiləri "Şerif"i analiz ediblərmi? Kərimov bu suala belə cavab verdi: "Üçlü müdafiədən istifadə edirlər. Məşqçilər oyunlara baxıb. Diskləri əldə edib analizlər aparmışıq. Hücumlar qurmağa çalışan komandadı".