“Qarabağ”ın sükutu pozacağı gün...

“Qarabağ”ın sükutu pozacağı gün...
"Qəbələ” dünən 8-ci transferini reallaşdırdı. Bununla da əyalət təmsilçisi yeni avrokubok mövsümünə də, Azərbaycan Premyer Liqasına da iddialı başlayacaqlarına işarə vurdular. Roman Qriqorçuk yenə də böyük yürüşə başlayır. Çox istərdik ki, bu yürüş uzun sürsün, Avropa Liqasının qrup mərhələsindən o tərəfə də keçsin. 

"Qəbələ”nin güclənməsi təkcə bir klubun ölkə çempionatında uğurlu çıxışı, avroliqada Azərbaycanı uğurla təmsil etməsi, qrup mərhələsinə yüksəlməsi üçün vacib deyil. "Qırmızı-qaralar”ın gücünə güc qatması bütövlükdə Premyer Liqada rəqabətin artacağına, "Qarabağ” üçün yeni stimul yaranacağına çağırışdı. Roman Qrirorçuk klubun menecerləri ilə birlikdə sözün yaxşı mənasında katalizator rolunu oynamağı, "transfer bombaları”nın fitilini alışdırmağı bacarıb. 

Onlar topu "Qarabağ” tərəfə atıblar. Qarşı tərəfin nəylə cavab verəcəyini maraqla gözləyirəm. Dünyanın heç bir yerində iddialı klublar təkcə daxili çempionatı nəzərdə tutub, gurultulu transferlər etmirlər. Özü də "Qarabağ”ın yerlilərdən qurulmuş heyəti belə Premyer Liqa üçün yetərlidi. Bunu biz "Neftçi” ilə ölkə kubokunun yarımfinal oyununda görmüşük, "Qəbələ" ilə vacib görüşlərdə də. Amma bir halda ki, "Qəbələ" güclənməyə başlayıb, deməli, "Qarabağ" da mütləq güclənəcək!

Diqqətli oxucularımızın yadında olar. Mövsüm başa çatandan sonra tranferlərlə bağlı fikirlərimi sizinlə bölüşərkən vurğunu məhz bu məqamın üzərinə qoymuşdum. "Qarabağ” əsas rəqibinin, ölkə çempionatında ona əlcək atmağı bacaracaq tək komanda olan "Qəbələ”nin transfer bazarında necə davranacağını diqqətlə izləyəcəkdi. Çünki qəfildən "yarpaq tökümü”nə başlayan "Qəbələ” hamını təəccübləndirmişdi. O cümlədən də "Qarabağ” rəsmilərini. Çoxları elə düşünürdü ki, klub prezidenti Tale Heydərovun Naxçıvanda verdiyi incə mesaj öz təsirini göstərir. "Qırmızı-qaralar”ın mövsüm başlamadan çempionluq iddialarından əl çəkəcəyi ilə bağlı yaranan görüntü "Qarabağ”ı da müəyyən mənada rahatlatmış, transferlərdə gözləmə mövqeyinə çəkilməyə məcbur etmişdi. 

Heç şübhə etməyə dəyməz ki, iyulun ilk 10 günü transfer xəbərləri ilə daha da zəngin keçəcək. Artıq bu gün Bakıya qayıdacaq "Qarabağ”ın 3-cü transferini rəsmiləşdirəcəyi gözlənilir. Polşalı Yakub Rzejniçakın hələ 31 yaşı tamam olmayıb. Deməli, bir müdafiəçi üçün ən yaxşı vaxtındadı. "Şaxtyor”un qapıçısını heyətə qatmaqla Şehiçi qəflət yuxusundan oyadan Qurban Qurbanovun müdafiədəki bərkitməni bitirəndən sonra yarımmüdafiəyə və hücuma da diqqət yetirəcəyinə ürəkdən inanıram. Mövcud şərait, Avstriyadakı yoxlama oyunları, Çempionlar Liqasının qrupuna yüksəlmək vəzifəsi bunu tələb edir.

Həmin gün bu gündü. Elə bu gün "Qarabağ” sükutu pozmağa başlasın. Bundan sonra keçən hər dəqiqə itirilmiş zamandı!

Amal ABUŞOV



Xəbər lenti