"Qəbələ" udsa, onu "blok"a atacam..." - Sevinclərin dueli

Həftəsonu Azərbaycan Premyer Liqasının VIII turunda "Qarabağ" səfərdə "Qəbələ"nin qonağı olacaq. 

Baxmayaraq ki, "Qəbələ" turnir cədvəlində autsayderlər sırasındadır, bu görüş azarkeşlər üçün böyük əhəmiyyət kəsb edir. Xüsusilə də, "Qarabağ" və "Qəbələ"nin Sevincləri üçün. Söhbət "Qarabağ" azarkeşi Sevinc Məmmədova və "Qəbələ" tərəfdarı Sevinc Novruzovadan gedir. 

Sport7.az onları qarşı-qarşıya gətirəcək bu görüşlə bağlı adaşların fikirlərini öyrənib:. 

- Oyunu izləmək üçün Qəbələyə gedəcəksiniz? 
Sevinc Məmmədova: Əslində planda getmək var. Ama gedib-getməyəcəyim ayın 19-u bəlli olacaq. Yeni işə başlamışam. Müdrüm türkdür və həddən artıq disiplinli, sərt adamdır. Xəstəlik, ölüm, itim, heç bir şey ona işdən qalmaq üçün səbəb hesab olunmur. İndi onu yola gətirməyə bəhanə axtarıram. Ümid edirəm alınar.
 

Sevinc Novruzova: Qəbələyə getmək fikrim var. Bu bizim ev oyunumuzdur. Ayda iki dəfə oraların havasını almaq mənim alın yazımdır. Oyunun vaxtı da şərait yaradır ki, oyuna gedib rahat baxıb qayıdasan. 

-  "Qəbələ" - "Qarabağ" görüşündən hansı nəticəni gözləyirsiniz? 
Sevinc Məmmədov: "Qəbələ" evində yaxşı oynayır. Heyətdəki köklü dəyişikliklərə baxmayaraq, bizə qarşı müqavimət göstərəcəklərinə əminəm. Sənan Qurbanovun istefası, ardından məşqçilər korpusundakı dəyişikliklər oyun planında mütləq özünü göstərəcək. "Təzə kuzənin suyu sərin olur", - deyib atalar. Bu baxımdan çətin oyun olacaq məncə. Üstəlik ayın 24-ü avrokuboklarda çətin oyuna çıxacağıq. Ona görə Qurban "hoca"nın "Qəbələ"yə qarşı hansı heyəti oynadacağını da bilmirəm. Zədəlilərimiz də var. Hesab deyə bilməyəcəm. Amma çətin bir qələbə qazanacağıq kimi hiss edirəm.
 

Sevinc Novruzova: Keçən ilə kimi o klubla çempionluğa oynayırdıq, aramızda rəqabət var idi. Mənim üçün fərqi yoxdur, istər "Qarabağ”, istərsə də "Keşlə” ilə olsun oyun, yenə də gedib baxacam. Nəticə haqqında heç nə deyə bilmərəm, vaxt olub ki, 2:0, 1:0 öz meydanımızda qalib gəlmişik, heç-heçə etdiyimiz, uduzduğumuz anlar da. Ona görə indidən nəsə demək çətindir. Düşünürəm 0:0, və yaxud da 1:1 olar. 

- Sosial şəbəkələrdə tez-tez oyundan əvvəl və sonrakı halınıza aid "caps"lar paylaşırsınız. Reallıqda necə olur münasibətiniz? 

Sevinc Novruzova: Sevinclə 90 dəqiqədən başqa münasibətimiz çox yaxşıdır. Sadə, mehriban, insanı halından anlayan, bir sözlə yaxşı qızdır. Oyuna sakit baxsa, iynəli statuslar yazmasa, söz atmasa, 90 dəqiqə də mehriban ola bilərik.(gülür)... Oyundan əvvəl təbii ki, rinqə çıxan iki boksçu kimi bir-birimizə sözlər deyirik, klublarımız haqqında gəlmişi keçmişi yada salırıq. Oyun sonu isə nəticədən asılı olur. Hansı klub qalib olarsa, təbiidir ki, o azarkeşin də üstünlüyü, deməyə sözü, atmacası olur.  Hər iki komandaya uğurlar. İnşallah "Qəbələ” qalib gələr.
 

Sevinc Məmmədova: Mənim rəqib azarkeşlərlə həmişə atmacalarım olur. Amma adaşım elə məsələlərdə daha sakitdir. Üstəlik indi komandasının vəziyəti də ürəyaçan deyil. Ama onu çox istəyirəm deyə çox da qıcıq vermirəm. Bu oyun üçün banner ideyam var. Sadəcə olaraq çox sərt bir şeydir deyə, səfər matçına aparmağa dəyməz. Aparsam da, içəri buraxmazlar. Adaşıma bu haqda deyəndə qıcıq oldu, sadəcə əlindən bir şey gəlmir, nə etsin qız. İşdi birdən onlar bizə qalib gəlsələr, adaşımı hər yerdə "blok"a atacağam. (gülür)...

Qeyd edək ki, "Qəbələ" - "Qarabağ" görüşü 19 oktyabr saat 17:00-da Qəbələ şəhər stadionunda keçiriləcək. Ağdam klubu 21 xalla turnir cədvəlində başçılıq edir. Əyalət təmsilçisi isə 5 xalla 7-ci pillədə qərarlaşıb. 

Röya Kərimli
Sport7.az



OXŞAR XƏBƏRLƏR

XƏBƏRLƏR
BLOGLAR