Səmra Qolasso:

Səmra Qolasso: "Qatı azarkeşlik yavaş-yavaş sönüb"

Futbolsevər xanımlarla müsahibələrə davam...

Bugünkü həmsöhbətim Səmra Əliyevadır (Qolasso). O, saytımıza müsahibəsində həm özü, həm də futbolla bağlı fikirlərindən bəhs edib. 

- Əvvəlcə səni yaxındaq tanıyaq..
- Televiziya tamaşaçısının Səmra Əliyeva, radiosevərlərin Səmra Qolasso kimi tanıdığı aparıcı və Azərbaycanın ilk peşəkar xanım futbol şərhçisi. 
 


- Necə oldu ki, futbola könül verdin?
- Futbolla 11-12 yaşımda məhəllə yoldaşlarımın sayəsində tanış oldum. Ramin adlı qonşum mənə dəftər verdi və dedi ki, sən hesabları və xəbərləri yazmağa davam elə. Mən də davam etdim. O dəftər 2, 3, 4 və s. dəftərlərə çevrildi. (gülür)... Müsabiqə yolu ilə radioya düzəldim. Antenn 101 FM-də məşhur prodüser Zaur Kazımov istedadımı kəşf etdi. Açığı, məni bu sahəyə məhz o yönəltdi: öyrətməyi, məsləhətləri, dəstəyi ilə. "Qolasso" təxəllüsünü də o fikirləşmişdi. Beləcə, idman xəbərlərini təqdim etməyə başladım. Sonra Doktor Ziya ilə birgə çalışmaq da mənə təcrübə qazandırdı. Beləcə, futbola gəldim. Maneələrin çox olduğunu da demədən, keçə bilməyəcəyəm. 

- İdman aləmində olan xanımlar daim maneələrlə rastlaşırlar. Sənə mane olan məqamlar nələr olub?
- Detallara girmək istəməzdim, amma xeyli olub. (gülür)...
 


- Bu maneələri aşmağında jurnalistika sevgisi, yoxsa futbol sevgisindən ilhamlandın?
- Bu, uşağa verilən "atanı çox istəyirsən, yoxsa ananı?" sualına bənzədi. Sözün açığı hər ikisindən ilhamlandım. Amma idman jurnalisti olmasa idim, siyasi jurnalist olacaqdım.

- Sevimli klubun hansıdır?
- "Bavariya".
 


- Özünü qatı azarkeş hesab edirsən? Matç izləyərkən emosionalsan?
- Əvvəl bu, daha çox idi. Amma bu sahədə işləyəndə hər şeyə peşəkar yanaşmağa çalışırsan, daha obyektiv olursan, komandanın səhvlərini tutmağa çalışırsan və s.

- Həyat yoldaşın Firuz Abdulla bəy də futbol camiəsindəndir. Həyatını paylaşdığının insanla eyni sahədə çalışmağın üstün cəhətləri nədir?
 - Ən azı söhbət etməyə, bölüşməyə, hətta mübahisə mövzusu yaranır. (gülür)...

- Hər halda matç izlərkən mübahisə olur?
- Oyunla, komandanın yaxşı, ya pis oynaması, müəyyən bir epizodla bağlı.
 

- Bəyəndiyiniz komandalar qarşılaşanda evdə necə atmosfer yaranır?
- Hələ ki, belə bir durumla qarşılaşmamışıq. (gülür)... Amma qarşılaşsalar, ki bu mümkündür, mən aqressiv şəkildə azarkeşlik etməyəcəyəm. Çünki bu sahədə çalışdığım zamandan başlayaraq qatı azarkeşlik yavaş-yavaş sönüb.

- Övladınının gələcəkdə idman, və ya mətbuat sahəsində olmasını istərdin?
- Sözün açığı, bu sahədə çalışmasını istəməzdim. Bilmirəm, nə ilə bağlıdır, amma mən övladımı həkim kimi görmək istərdim. Yenə də son sözü güman ki, özü deyəcək. Kim olur, olsun, amma işinin peşəkarı olsun. Yəni, yarımçıq papaqçı olmasın. (gülür)...

Röya Kərimli
Sport7.az
 





OXŞAR XƏBƏRLƏR

XƏBƏRLƏR
BLOGLAR