Bizim futbolun ən böyük bəlalarından biri də nə istədiyimizi bilməməyimizdi. Yaxşı oyunmu, nəticəmi, yoxsa gələcək vəd edən futbolçuların yetişdirilməsi? Hələ də seçim etməmişik. Bunu bilmədiyimizdəndi ki, xaotik və sistemsiz bir futbol dünyamız var. Bir addım irəli atanda mütləq iki addım geri atırıq.

Yaşar Vahabzadənin IV İslam Həmrəyliyi Oyunlarında ölkəmizi təmsil edəcək U-23 yığmasına dəvət etdiyi futbolçuların siyahısına baxdım. Başdan-ayağa müəmmadı. Bilmirsən ki, cənab Vahabzadə gənclərin önünü açmaq, onlara özünü göstərmək üçün şans vermək niyyəti güdür, ya da nəticə qazanıb, öz sinəsini irəli vermək həvəsindədi.

Sözsüz ki, ən mübahisəli məqam 23 yaşını tamamlamış futbolçularla bağlıdı. Yaşar bəy öz seçimini Rəşad Sadiqov, Ruslan Abışov və Ağabala Ramazanovun xeyrinə edib. Bu futbolçulardan ikisi "Qarabağ”la "Qəbələ”nin əsas heyət üzvüdü. Yayda hər ikisi avrokuboklara qatılacaqlar. Onlara digər komanda yoldaşları qədər istirahət hüququ vermək heç də pis olmazdı. Üstəlik, fiziki yorğunluğun gətirə biləcəyi zədə riskini də nəzərə almaq lazımdı. İslam oyunlarına qatılanların sərt oyuna meyilli olması da şübhəsizdi. Vacib avrokubok mövsümü öncəsi "Qarabağ”la "Qəbələ”nin əsas heyət üzvlərindən birini itirmək ehtimalı ilə üz-üzə qoymaq kimə lazımdı?

Rəşad Sadiqovun mürəkkəb xaraketri də bir ayrı dərddi. Bilənlər bilir ki, Rəşad nisbətən gənc futbolçulara yuxarıdan aşağı baxır, onlar üzərində hökmranlıq etməyi sevir. Vahabzadənin komandasında yer alanların üçündən savayı digərlərinin yaşı 23-dən aşağı olduğunu nəzərə alsaq, onların Sadiqovla ehtiyatlı davranmaları vacibdi. Yoxsa, millimizin düşərgəsindən dava-dalaş xəbərləri də eşidə bilərik. Mən mövsüm ərzində Rəşadın gənclər barədə dediklərini xatırlatmaq istəmirəm. Ümid edirəm ki, çox hörmətli Yaşar bəy bunları nəzərə alacaq.

Ruslan Abışov da mövsümü qeyri-sabit keçirib. Xüsusiylə, mövsümün sonluğu Ruslan üçün uğursuz keçdi. Son turda "Qarabağ”la oyunda avtoqol müəllifinə çevrildi. "Zirə”ylə qarşılaşmada isə Elxan Abdullayev məhz onu əvəzləyərkən limiti pozmuş, "Neftçi”yə texniki məğlubiyyət "qazandırmışı”. Eyni zamanda Ruslan İslam Həmrəyliyi Oyunlarının səfirləri sırasında yer aldığından onun düşərgəyə çağırmamaq da mümkün idi.

Əvəzində gözlənilənlərin əksinə Rauf Əliyev U-23-dən kənarda qalıb. Hücumçu hazırda yaxşı formadadı, mövsümün sonuna doğru "İnter” üçün vacib qolların müəllifi olmuşdu. Furbol dili ilə desək "ayağı açılmış” hücumçunun xidmətinə ehtiytac duymamaq nə deməkdir? Yazının əvvəlində qeyd etdiyim kimi, yenə də konret strategiyanın olmaması özünü göstərir. Bilmək olmur ki, Yaşar Vahabzadənin komandasının İslam Həmrəyliyi Oyunlarında hədəfi nədir. Görəsən özü bunu bilirmi? AFFA onun və komandasının qarşısına hansı hədəfləri qoyub? Baxımlı oyun, yaxşı nəticə, yoxsa gəncləri püxtələşdirmək?
 
Amal ABUŞOV