“Neftçi” kimlə güclənəcək? – “Xalq komandası” çıxılmaz durumda

“Neftçi” kimlə güclənəcək? – “Xalq komandası” çıxılmaz durumda

Amal ABUŞOV
 
2018-ci ilin iyununda "Neftçi”nin düşərgəsində əsl bayram ab-havası hökm sürürdü. Rəhbərliyin üzü gülür, azarkeşlər sevinirdi. "Xalq komandası” axtardığı xilaskar məşqçini Moldovada tapmışdı, daha doğrusu İtaliyada. "Şerif”dən ayrılan italyan mütəxəssis Roberto Bordin "Neftçi”yə baş məşqçi təyin edilirdi.

Həmin vaxt yayılan rəsmi açıqlamada qeyd olunurdu ki, "Neftçi” futbol klubunun Müşahidə Şurasının və təsisçilərin növbədənkənar ümumi yığıncağı keçirilib. İclasda əsas komandanın baş məşqçisi postuna namizədin müzakirəsi aparılıb və italiyalı mütəxəssis Roberto Bordin bu vəzifəyə təyin edilib. Onlar deməsələr də, biz yaxşı bilirdik ki, Müşahidə Şurasının növbədənkənar iclası formal keçirilmişdi. Bordinin "Neftçi”yə gətirilməsi qərarı daha "yuxarı”da verilmiş, şura üzvləri qatıldıqları iclasda bu qərara əllərini yuxarı qaldırmaqla razılıq vermişdilər (bəlkə, heç onların əllərini yuxarı qaldırmalarına da ehtiyac duyulmamışdı).

Bəli, Bordin yaxşı çalışdırıcı idi. Amma Moldova çempionatı üçün. Biz öz çempionatımızın səviyyəsiylə elə də qürrələnə bilmərik. Di gəl ki, xeyli müddətdi ki, bizim çempionatımız və klublarımız Moldovadakılardan xeyli öndədi. Buna ən yaxşı sübut çempionumuz "Qarabağ”ın az qala hər mövsüm "Şerif”ə yerini göstərməsidi. "Neftçi”ylə razılığa gələn Bordin də bu vəsiləylə "Qarabağ”dan qisas almaq şansı qazanmışdı. Adam Çempionlar Liqasında uduzduğu "Qarabağ”ı və Qurban Qurbanovu Azərbaycan çempionatında üstələməklə həmin uğursuzluğu unutdurmalıydı. Bacardımı? Xeyr!

Həmin mövsüm komandanın idman direktoru, əslində isə baş meneceri Ceyhun Sultanovun da alveri şıdırığı getdi. Təsəvvür edin, heç yerdə yüksək səviyyədə futbol oynamamış Karikari adlı birini "Neftçi”yə "vəhşi” ləqəbiylə gətirmişdilər. Adam burda gənc Mirabdulla Abbasovla rəqabətdə uduzdu. Sonra da gününü keçirmək üçün Dubaya yollandı. Bu günlərdə aldığım məlumata görə, hazırda Misirdə eyni işlə məşğulu. Yəni ki, "Neftçi”dəki kimi gününü keçirir, özünə və menecerlərinə pul qazandırır. Bu "möhtəşəm” transferin ideya müəllifi Ceyhun Sultanov sonradan aforizm sayılacaq bir kəlamıyla "ağ-qaralar”ın acınacaqlı durumunu gözlər önünə sərdi: "Neftçi” nə üçün çempion olmalı idi ki?!” Azarkeşlər qəzəbli idilər. Amma nə olsun?

Bordinin "Neftçi”dən necə yola salınacağı ilə bağlı proqnozumu aylar öncə vermişdim, demişdim ki, italyanı komandadan gecəylə göndərəcəklər. Dediyim kimi də oldu. Bir qış axşamı Sinyor Roberto vətəninə yola salındı. Səhv etmirəmsə, Bakıdan gedəndən işsizdi, ən son İtaliyanın səviyyəcə 3-cü liqası sayılan D dvizionundan hansısa klubla danışıq apardığını oxumuşdum. Bordindən sonra "Neftçi” Füzuli Məmmədova tapşırıldı. "Neftçi” pandemiyaya görə yarımçıq saxlanılan çempionatın ikincisi oldu. Deməli, prinsipcə, italyan Bordinlə azərbaycanlı Məmmədov arasında böyük fərq yox idi. "Neftçi”nin olacağı bu idi, gücü buna çatırdı. İndi Məmmədovu da Abasov əvəzləyib. "Ağ-qaralar” "Qarabağ”dan bir oyun çox keçirib və ağır avrokubok səfərlərinin, pandemiyanın yorğun saldığı "köhlən atlar” "Neftçi”dən bir xal geri qalır. İndi çox az adam şübhə edir ki, "Neftçi”nin qış fasiləsinə lider yollanması müvəqqəti xarakterlidi, uzabaşı martın ortalarında hər şey əvvəlki axarına qayıdacaq.

Bu yaxınlarda "Neftçi” azarkeşləri "Feysbuk”da klub prezidenti Kamran Quliyevin müsahibəsindən seçmələr paylaşmışdılar. Mənim də rastıma çıxdı, göz gəzdirdim. Cənab Quliyev əminliklə "Neftçi”nin çempionluğa layiq olmasından, qızıl medalları daha çox istəmələrindən danışıb. Bunun üzərindən heç üç gün keçməmiş Samir Abasov efirə çıxdı, hər şeyi alt-üst etdi. Məlum oldu ki, qış fasiləsində "Neftçi” üç əcnəbi hücumçuya elçi düşüb, heç biri "xalq komandası”nda oynamağa razılıq verməyiblər. Vaxt var idi, klub rəsmiləri ta uzaq Braziliyaya yollanar, orda sayılıb-seçilənləri "Neftçi”yə dəvət edərdi. "Sambaçılar” da bura sevə-sevə gələrdi. İndiki "Neftçi”nin əksər futbolçuları həminki heyətin heç ehtiyat oyunçular skamyasında oturmağa layiq bilinməzdilər. 

"Xalq komandası” çıxılmaz durumdadı. Liderliyi qorumaq, "Qarabağ”ı çempionluq taxtından salmaq üçün güclənmək lazımdı. Amma kiminlə? "Neftçi”ni kim gücləndirəcək? Bağışlayın, mən o sualın cavabını bilmirəm!
 
 

OXŞAR XƏBƏRLƏR

XƏBƏRLƏR
BLOGLAR